إنتظار

ذبلت أيامي في إنتظارك يائسآ
نجم" حدا ببريقه ليل الشقاء
أشكوك للأطلال والليل الطويل مسهدآ
كذبآ أمني النفس ساعات اللقاء
من يا ترى سيجفف الدمع السخين ويشتري بقميص حزني ضحكة
في عالم ألف البكاء
ماذا أقول؟
مادمت وحدك قد ملكت فجاج قلبي دون إذن بالدخول
مادمت أنت فجيعتي ومصيبتي وجميل أيامي وإن شكت الذبول
..
في كل عيد ألبس الذاهي وأحرق كل أنواع البخور
وأردد الشعر الذي علمت عنك برغم جهلي بالبحور
وأعد أصنافآ من الوجبات سرآ ثم أطعمها الطيور
فالعيد دونك دائمآ لحظاته مثل الشهور
..
ويمر عيد بعد عيد بعد عيد
ثم ذا عيد" يفوت
وأظل دومآ في إنتظارك صابرآ لا أشتكيك لظى البيوت
فالجرح أكبر من مجالات الصراخ لذا يلثمني السكوت
والدمع قد يعمي عيوني إنما مادمت أنت بداخلي أنا لن أموت

محمد الطاهر محمد
فبراير 2010

مـجـنـونـه

كفن عينيك شوف الخلوق تتجارى محجوبة سمع
هجع الوجع جواكي عشعش من سنين وفي قلبك الباكي أضجع
يا دا الوجع
أمرق كفاك جنة هواك ما بتشبهك
لملم عضاك وشوف اليجر بوراكا أو يوم يندهك
أنا والحنين وحبيبتي لمانا القدر
وما أظن نعود من تاني لي داك المحك
كملت فيك عشق الحروف والليله عاد عمرآ جديد
ما ريحك
ما فررحك
أمرق كفاك جنة هواي ما بتشبهك
..
محبوبتي ما ذي البنات
ما أتوهطت دون تدري شوق
لا أتدق بن عينيها سوق
لا أتهد باله ولا أنشغل
مجنونه محبوبتي وعسل
بقعد رموش عينيها ضل
أتونش الشوق في العيون
تتلمس الشعر الغزل
تسرق لساني وقت أشوف عينيها تترمش أمل
..
بتونسه
وفي جوفي جوه أتحسسه
لون الصباح
عبق المسا
ترسم خرايط الكون عيون
في قوامه سر الهندسه
تأسر فؤادي وقت أقيف وأدخل جواها المدرسه
وكأنو لا كان لا حصل
أنا أصلي ما أتعلمت يوم غير إني أرجاك في الطريق
وأحفظ مشيك وأقراك جمل
محبوبه مجنونتي وعسل
مجنونه محبوبتي وعسل
زغراده في نص الفريق
رياده مغشية عيون
سجاده لي خالق الجمال
عباده دون لحظة ملل
تمشي ورشاقه الروح جمال
تجري وأحصنه بالفلق
من شر كل ما قد خلق منذ الأزل
بت متسق صور الطهاره النابعه من عف الضمير النادي طل
بت من عسل خمر الكلام الساقيا إيده
تدق هشاش بابي وأقيف
الدنيا صيف
والحاله كيف
باقي الأجور
جبر الكسور
فول الفطور
حق الرغيف
تدخل علي والشوف كفيف تصبحني ذي فجرآ أطل
ما دايره تجرح فيني بال
جات والأمل والشوق حضور
تكتب سطور عهد الوصال
مجنونه عسلآ بت حلال
ما فيها خوف
وقاده جوف
عز الخريف
بنايه طوف
ضوايه نور
عز الكسوف
متوطنه
ومتحصنه
ومتمكنه
وكتين يقيف الحال حروف
عاجباني حال
سارالي بال
وفي خاطري جال إحساسه شوف
لا عاشقه غيري عشان تفوت
ولا يوم هواها لقيتلو حل
مجنونه محبوبتي وعسل


محمد الطاهر محمد
مارس 2009

وطــنــي أبــي

جبلين وقوف عزه وصلابه بلا إنحنا والدنيا حر
والناس تطارد في السراب والباقي راجيين المطر
جبلين وقوف صدر الأرض لما أنكشف وإتجارو جواهو البشر
والنيل وغابات النخيل والصحرا مقصوفة ضهر
..
يا بت سلام
الأرض عريانه وما عيب أحشاها حاضنه الإحترام
تعبت رحيح الناس سنين وإتغطى طينه عليها نام
الواطه نامت من تعب وأحلامه طالت ألف عام
وإستحلمت طورية العبد الشقي في طينه بتداعب مسام
وحملت أمل ناس من سنين داسنو من حرف الكلام
كضاب أبو القال ليكي يوم الواطه حملت في الحرام
..
يا بت سلام
عمره الشرف ما كف يوم حالك يحاكي الإفتتان
وما كان شغف قلبك يذوب وعينيكي تتدفق حنان
ذي دمعتك وإبريق أبوي عرقي بيبل رحم الأرض تنبت أمان
أو تستكين تغرق سنين تضحك علي حال الزمان
..
يا بت قدر حيل المظنه يشيل عليك ميلي وفرح إتدفقي
وكل ما حرق جوفك حرف أنفيهو عنك وأمرقي
ورشي الفرح في كل باب وإياكي تبكي وتشفقي
ولو يوم سهت عنك شمس أنسيها وأطلعي أشرقي
..
يا واضحه ذي شمس الله في كبد السما ومصلوبه ما محجوبه إلا من الغبي
يا آهله ما متساهله في شرف العرب والنوبه يا مفطومه بي حب النبي
يا طاهره ما معيوبه غير بالطيبه والإحساس وروح الطفله في جسم الظبي
..
غضب النخيل النسمه جات منقسمه بينك والصبي
وعطش البحر بعدك وقوز الرمله ينده قرربي
والبابنوس يتشابى حين ساق التبلدي أتتنى قاللك أشربي
وشربتي من حب الوطن غنيتي ما لاقاكي ظن وطني أبي
..
{< وطني أبي أنا وأبنوس في حلفا قام
دارفور تغني القاش ويصفق الحمام
بتسامح المسيح وسنة الإسلام
سوا سوا هلال صليب وطني سلام سلام >}
..
كنت زمان بقوللك غني حين ألقاكي عند الداره
داك الحين أبيتي تغني شان شفتيني شلت سجاره
شايفه غناكي بين رجاله ليكي حقاره
إتعجرفتي وإتنرفزتي فتي الداره
..
شن خلاكي هسه تغني؟
لا موسيقا لا طمبور
لا كورس وراك لا رنه
لا دلوكه لا طمبور
كل غناكي أضحى تمني
تبكي تئني
من خاطرآ صبح مكسور
ولي حلمآ صبح مدثور
ومن قلبآ صبح مكسور
ولي دارفور
..
فلا حلمك تنومي سعيده
لا من ناره تبقي بعيده
لا عشمك تسكني قصور
وما بيعنيكي جوطه ولخمه
ما هاميكي طول العتمه
حاساه في جواكي النور
وراجياها الليالي تدور
..
وباكر تلحقي المفزوعه
باكر تضحك المفجوعه
تسلم من ظماها وجوعه
تلقى سرور
وتمسح بي إيديها دموعه
تفرد قامته المفروعه
تشرق هامته المرفوعه
في عينيها تصحى بدور
وحين توتيل يلامس التاكا فايض نيله يسقي بذور
تزين الدنيا بي كوراكه تتفتح خدوده زهور
..
تضحك وقت تبكي الغيوم
تفرح إذا غضب البحر
بت دون بنات الناس جميع
أحلامه ضاق بيها الدهر
إتكففن إحساسه الربيع
إتدففن أنفاسه الزهر
كل ما أقول أنسها يوم
تزعل غيوم تنزف مطر

محمد الطاهر محمد
يناير 2011

مــطــرود

عن حبي إنت براك رضيت طول المسافه الإحتمال
ولامن فترت براكا جيت ما أظن في زول قال ليك تعال
جايي بتفتش عن قليب نسيت ملامحو مع الضلال
قلبآ حباك كل ما ملك وختاكا في الشعر إرتجال
سواك حبيبو وجمملك وضماك لهفه وإنشغال
عز المصايب زمملك من الهجير وقساوته كم والبرد والمطر الوبال
في كل يوم يتأملك وينسج حروفو مع الخيال
وجزاهو أيه؟ غير الخداع والظلم وطول الإحتيال
وطعنتو في وضح النهار وديت شموسو على الزوال
ودفنتو في النسيان سنين أدمنت عنو الإنشغال
وعاوز ترججع للحنين؟ أنا كوني أرجعلك محال
..
خليك بعيد في توب غرورك وعزتك ما الريده مولودة صدف
ولو نازعت خاطرك ملامح ذاتي في وسط النجيع والناس علي صفآ في صف
أو إني غاير في سعير لا أتهد حيلو ولا وقف
إياك تغالبك دمعتك ما تجيب ضميرك لو هتف
إياك تغالبك دمعتك ما تجيب ضميرك لو هتف
وإياكا تبكي على الضياع يا مجمل أسباب الأسف
..
أبعد وفوت طول ما خطاكا تقددرك
وأوعاك تفكر يوم تجي أو ترتجي ومشواري أوع يفتترك
ورغم إجتوايا وطول جفاك أنا كنت دايمآ بعذرك
..
أنا بعذرك إنك مشيت من غير توادع ودون سلام
أنا بعذرك مهما لقيت منك أسى ومهما يكون منك خصام
أنا بعذرك إنك رميتني على الشقا وخليتني أحسب في الأيام
وأنا بعذرك لو كنت شايف الحب حرام
..
بس كونو تكسر قلبي يوم تنكر وفايا ولهفتي
ومن غير سبب تعشق سواي تسقيهو مني معزتي
وتشوف هواي ذي الحلم والريده كانت غلطتي
قادر أسبك وأطردك وأقفل وراك باب جنتي
..
أنا قلبي تاب من سكتك أوعاك تجيب خطوك علي
والله لو تسجد سنه وتبكي وتتحسر علي
وتجيب مصابيح السما والدنيا كلها بين إيدي
ما أظني أغفر ليكا يوم قطرة دموع بلت عيني
..
مطرود ولا أسفآ عليك وعليكا غضبي ولعنتي
ووين ما مشيت يبراك أسى وذي حالي تغشاك وجعتي
ويوماتي بالنار تصطلي علشان تقددر جنتي
وتغرق في كاسات الظلم وتضوق أسايا ولوعتي
..
وإن شاء الله ما طاب لك جرح ، لملم همومك وهدهدا
وشيل إعتذاراتك وفوت ، كووم مشاعرك وأبعده
أنا قلبي ضل معاك كتير ويادابو هسه إهتدى
وإنعل أبو السماك حبيب وملعون أبو الحب لو كده

محمد الطاهر محمد
فبراير 2010

متمنيك معاي!!

من غير هواك أنا ما بموت لكني متمنيك معاي
نشبك إيدينا علي بعض وأديكي من حني ودفاي
داير وقت ينشز غناك أنا ليك أشد أوردتي ناي
ولامن يخون عشقك زمن جرحك أضمدو بي وفاي
..
والله لو كان بي إيدي أفرش دروب الكون زهور
وما تخدشك نسمة صباح وأسقيكي من لبن الطيور
ولو عاوزه روحي أسيبه ليك وأموت وبي ريدك فخور
وأسمي نفسي شهيد هواك وأحجي بيك ناس القبور
..
لا تبكي مني لا أشتكيك ولا يوم تخش بيننا الظنون
ليك أفرش الروح متكأ وأسقيكي من موية العيون
نفطر عشق نتعشى موسيقا وفنون
نتغدى شوق ودمعة وفا أو ضحكه من قلبآ حنون
..
د أنا كنت عاوز أبني ليك بين النجوم وسناها عش
أنا كنت ناوي أهدي ليك القمرا وأبقالك شمس
إخترت ليك دون الخلوق سكنآ يطل بابو الرمش
وحلمت إيدي في إيديك في سكة الأفراح نمش
..
الجنه كانت بين إيديك كل البوابات مشرعه
والحور حداك وبغنو فيك وأريكة الريد متكا وثمار معزه بتشتهيك
أنهار عسل وأنهار لبن وشلال عشق من قلبي ليك
وأنا كنت في صهوة جوادي الأبيض السرج الحرير وبنادي من جواي عليك
لك في الجنان ما تشتهي كل حاجه في مكانك تجيك
عاهدتي قلبي على الوفا لو يبقى لقلبك شريك
كنا بنساهر الليل سوا كنت إنتمائك ومنتميك
صباحنا شوق ومسانا شوق تصبح على الشوق العليك
..
بس فجأه في لحظة غضب غيرتي لسكة مشيك
ورميتي عهدك في التراب ضيعتي حلمك بي إيديك
الجنه والخمر الحلال الحور والماء الزلال خيبتي كل آمالي فيك
وفتحتي أبواب الضلال نار الظنون حامت عليك
ودم الخيانه يخضضبك جواك ضميرك يعذبك وآآ حسرتك أوبآ عليك وآآ حسرتك أوبآ عليك
نار الظنون نهكت عضاك شالت معالم الروعه فيك
حرقت وفاكي وإلفتك
سرقت غناكي وفرحتك
شالت حبيبك ونور عينيك
وجواك ضميرك يعذبك وآآ حسرتك أوبآ عليك
..
ريدنا البنيناو بالوفا هديتي في لحظة غضب
ورجعتي تتهمي الظروف وإنو الزمن كان السبب
بتقولي لي بهواكا ليه مادمتي ما قدر التعب
وبتمشي درب الريده ليه وعارفاهو من أول صعب
..
من غير هواك أنا ما بموت
وما عدت متمنيك معاي
أنا حبي أطهر من نتانة قلبك المليان خداع
وأنا قلبي أرفع من مدارك الحيرة والخوف والضياع
أنا ثقتي في كل القلوب بانيها ذي أجمل قلاع
لا ببكي منك لا عليك ولا بيكي إنكسر الشراع
لكني في الآخر بقول يا ظالمه يا خاينه الوداع

محمد الطاهر محمد
مايو 2011

نفاج

مرقت تتمر شوقه من ريحة السفر طالت لهاة الحزن في إيده ونزف
ما معنى كلمة أوكسجين لما الحبيبه شفاها تتنقع زفير
يا مهتلك
أفتح لنفاج وجعتك حين سكرته
وأرجف
لسانك من شقوق الطين تقيل خبي المناديل في البساط
هذي البنيه حتسرقك روحك ولهث الزنجبيل
عينك تضوق الدنيا ذي ريحة صدام
تشهق تتكل حيلك أوزان الحروف
تستقبلك أو تقبلك بعض المساجد بي دعاك
تتغطي خوف
ما أروعك أو ما رعاك ما رووعك حين نلت شوف
هذي البنيه بتشبهك في لفحة المنديل ونكهة وجعتك
حاول تدسها من مجارير الشفوت
قبال تموت في إيده أنوار
السدف
قبال تقيد جيده أكوام الأسف
شغفك شغف وإنتزاعك بي ضراعك ما وقف
مادمت صلاي غير وكت
لا تتبن الحب الخزف

وطن للناس

غازلها قائلآ : حأبنيك للغلابه وطن عشان كل الخلوق تهواك
ردت : قبل تبني الوطن للناس حاول أبنيهو في جواك
وأعرف يعني أويه عزه وصحارى ونيل وقبل ما تحكي ليهو هواك
لامس قمة التاكا وجاور عود تبلديه وراعي الخالق السواك
حتلاقي الوطن وراك بأنك قبل ما تبنيهو هو اللي بناك
وما تزعل
ما إنت الحتبني وطن ما بتبنيهو بالضجه ولا بالجوطه والكوراك
ما هو الوطن البنحلم بيهو ما بتبنيهو إنت براك
بنحلم بي وطن أسمى وطن أغنى وطن شاسع
وطن لا هو ساسه لا عسكر لا متبوع ولا تابع
وطن أكبر من الواطه ويكون سقفو السما السابع
وطن أكبر من الواطه ويكون سقفو السما السابع
وطن أبرول وطوريه طباشيره وضحك شافع
وشتله كمنجه كوريه نشوف أمونه بتراجع
دروسه ومارقه عصريه وفي إيده كتاب تحس نفس الضحك طالع
جواب لي أحمد المحبوب ها يا أحمد تعال راجع
حبيبي انا من زمان قت ليك دار غير دارنا ما نافع
رحيح الدنيا شن أداك تصحى تنوم على الشارع
وإذا كان شوقي ما هاميك يكون حب الوطن دافع
تعال راجع
تعال راجع
بنحلم بي وطن ذي دا وطن إنسان وطن فنان وطن من در وطن من ماس
وطن بالفينا نبنيهو وطن بالحب وطن بالغيره والإخلاص
وطن للناس
وطن بالناس
.............
محمد الطاهر محمد
2008